சேரன்மகாதேவியில் தனியார் பஸ் கண்ணாடி கல்வீசி உடைப்பு!

மர்ம நபர்களுக்கு போலீசார் வலை – டிரைவர் காயம்

சேரன்மகாதேவி, அக். 8:
சேரன்மகாதேவியில் தனியார் பஸ் மீது மர்ம நபர்கள் கல் வீசி தாக்கியதில், பஸ்சின் முன்பக்க கண்ணாடி உடைந்ததுடன், டிரைவர் மார்பு பகுதியில் காயமடைந்த சம்பவம் பரபரப்பை ஏற்படுத்தியுள்ளது. இச்சம்பவம் தொடர்பாக சேரன்மகாதேவி போலீசார் வழக்குப்பதிவு செய்து மர்ம நபர்களை தீவிரமாக தேடி வருகின்றனர்.

அம்பாசமுத்திரத்தில் இருந்து நெல்லை புதிய பஸ் நிலையம் நோக்கி தனியார் பஸ் ஒன்று நேற்று முன்தினம் இரவு சென்று கொண்டிருந்தது. இரவு சுமார் 11 மணியளவில் சேரன்மகாதேவி பைபாஸ் சாலையில் உள்ள டாஸ்மாக் கடை அருகே பஸ் சென்று கொண்டிருந்தபோது, அடையாளம் தெரியாத மர்ம நபர் ஒருவர் திடீரென பஸ் மீது கல் வீசியதாக கூறப்படுகிறது.

இதில் பஸ்சின் முன்பக்க கண்ணாடி பலத்த சத்தத்துடன் உடைந்தது. கல் வீசியதில் பஸ்சை ஓட்டிக் கொண்டிருந்த டிரைவரின் மார்பு பகுதியிலும் காயம் ஏற்பட்டது. இதனால் அதிர்ச்சியடைந்த டிரைவர் பஸ்சை பாதுகாப்பாக நிறுத்தியதாக தெரிகிறது.

இதுகுறித்து பஸ் டிரைவரான கழுகுமலையைச் சேர்ந்த செல்லத்துரை மகன் மகேந்திரன் (40) என்பவர் சேரன்மகாதேவி போலீசில் புகார் அளித்தார்.

புகாரின் அடிப்படையில் சேரன்மகாதேவி போலீசார் வழக்குப்பதிவு செய்து விசாரணை நடத்தி வருகின்றனர். சம்பவம் நடைபெற்ற பகுதியில் பொருத்தப்பட்டுள்ள கண்காணிப்பு கேமராக்களின் (சிசிடிவி) பதிவுகளை போலீசார் ஆய்வு செய்து வருகின்றனர்.

மேலும், பஸ் மீது கல் வீசிய மர்ம நபர் யார், எதற்காக பஸ்சை குறிவைத்து தாக்கினார் என்பது குறித்தும் போலீசார் விசாரணை மேற்கொண்டு வருகின்றனர். சிசிடிவி பதிவுகளின் அடிப்படையில் சம்பவத்தில் தொடர்புடைய நபரை அடையாளம் கண்டு கைது செய்ய போலீசார் நடவடிக்கை எடுத்து வருகின்றனர்.

இரவு நேரத்தில் முக்கிய சாலையில் பயணிகள் சென்ற தனியார் பஸ் மீது கல்வீசி தாக்குதல் நடத்தப்பட்ட சம்பவம் அப்பகுதியில் பரபரப்பை ஏற்படுத்தியுள்ளது.