வீரவநல்லூர் 4-வது வார்டில் ரூ.3.80 லட்சம் மதிப்பில் புதிய மின்மாற்றி!
குறைந்த மற்றும் உயர் மின்னழுத்தப் பிரச்சினைக்கு தீர்வு காண நடவடிக்கை – பொதுமக்கள் பயன்பாட்டிற்கு மின் விநியோகம் தொடக்கம்
வீரவநல்லூர்:
திருநெல்வேலி மாவட்டம், வீரவநல்லூர் பேரூராட்சிக்கு உட்பட்ட 4-வது வார்டு பகுதியில் நீண்ட நாட்களாக நிலவி வந்த குறைந்த மற்றும் உயர் மின்னழுத்தப் பிரச்சினையைத் தீர்க்கும் வகையில், தமிழக அரசின் சார்பில் ரூ.3.80 லட்சம் மதிப்பீட்டில் புதிய மின்மாற்றி (டிரான்ஸ்பார்மர்) அமைக்கப்பட்டு, பொதுமக்களின் பயன்பாட்டிற்காக மின் விநியோகம் தொடங்கி வைக்கப்பட்டது.
வீரவநல்லூர் 4-வது வார்டு பகுதியில் அடிக்கடி குறைந்த மின்னழுத்தம் மற்றும் உயர் மின்னழுத்தம் ஏற்பட்டு வந்ததாகக் கூறப்படுகிறது. இதனால் அப்பகுதி பொதுமக்கள் பல்வேறு சிரமங்களைச் சந்தித்து வந்தனர். இந்தப் பிரச்சினைக்குத் தீர்வு காணும் வகையில், அப்பகுதிக்கு தனியாக புதிய மின்மாற்றி அமைக்க வேண்டும் என பொதுமக்கள் நீண்ட நாட்களாகக் கோரிக்கை விடுத்து வந்தனர்.
பொதுமக்களின் கோரிக்கையை ஏற்று, தமிழக அரசின் நிதி ஒதுக்கீட்டில் சுமார் ரூ.3.80 லட்சம் மதிப்பீட்டில் 63 கே.வி.ஏ. திறன் கொண்ட புதிய மின்மாற்றி அமைக்கப்பட்டது. இதனைத் தொடர்ந்து, புதிய மின்மாற்றியைப் பயன்பாட்டிற்குக் கொண்டுவரும் நிகழ்ச்சி நடைபெற்றது.
வீரவநல்லூர் மின்வாரிய உதவி செயற்பொறியாளர் பழனிகுமார் புதிய மின்மாற்றியைத் தொடங்கி வைத்து, மின் விநியோகத்தைப் பயன்பாட்டிற்குக் கொண்டுவந்தார். இதன் மூலம் அப்பகுதியில் நிலவி வந்த மின்னழுத்தப் பிரச்சினைகளுக்குத் தீர்வு கிடைக்கும் என எதிர்பார்க்கப்படுகிறது.
இந்த நிகழ்ச்சியில் தமிழக வெற்றிக் கழகத்தின் வீரை நகரச் செயலாளர் அழகுராஜா, மாவட்ட காங்கிரஸ் பொதுச் செயலாளரும் கவுன்சிலருமான சிதம்பரம், மின்பாதை ஆய்வாளர் வெங்கடேஷ், ஒப்பந்தப் பணியாளர்கள் ரவிக்குமார், முருகேசன், தமிழ்க்கண்ணன் ஆகியோர் கலந்து கொண்டனர்.
மேலும், தமிழக வெற்றிக் கழகத்தின் செயற்குழு உறுப்பினர்கள், வார்டு நிர்வாகிகள், சார்பு அணிகளின் நிர்வாகிகள் மற்றும் காங்கிரஸ் கட்சியின் 4-வது வார்டு செயலாளர் செல்வகணபதி உள்ளிட்ட பலர் பங்கேற்றனர்.
நீண்ட நாட்களாக நிலவி வந்த மின்னழுத்தப் பிரச்சினைக்குத் தீர்வு காணும் வகையில் புதிய மின்மாற்றி அமைக்கப்பட்டுள்ளதால், அப்பகுதி பொதுமக்கள் பயனடைவார்கள் என எதிர்பார்க்கப்படுகிறது.
