சென்னை: கார்ல் மார்க்ஸ் 208வது பிறந்த தினத்தையொட்டி எழும்பூரில் உள்ள கன்னிமரா பொது நூலகத்தில் அமைந்துள்ள சிலைக்கு விடுதலை சிறுத்தைகள் கட்சி தலைவர் திருமாவளவன், மார்க்சிஸ்ட் மாநில செயலாளர் பெ.சண்முகம், இந்திய கம்யூ. மாநில செயலாளர் வீரபாண்டியன் ஆகியோர் மாலை அணிவித்து மரியாதை செலுத்தினர்.
பின்னர் அவர்கள் கூட்டாக நிருபர்களிடம் கூறியதாவது:
தேர்தல் முடிவின்படி திமுக தலைமையிலான கூட்டணியின் நோக்கத்தை நிறைவேற்றும் வகையில் அதிமுக, பாஜ தலைமையிலான சங்பரிவார அரசியலை வீழ்த்தியுள்ளது. அந்த வகையில் நாங்கள் முன்னெடுத்த முயற்சி வெற்றி பெற்றதாக எண்ணி மகிழ்ச்சி அடைகிறோம். இதற்காக வாக்களித்த தமிழ் மக்களுக்கு எங்கள் நன்றியைத் தெரிவித்துக் கொள்கிறோம்.
வரும் 7ம் தேதி சென்னை உள்ளிட்ட தமிழகத்தில் உள்ள அனைத்து நகர்ப்புறங்களிலும், மாவட்டங்களிலும் இடதுசாரி கட்சிகளுடன் விசிக இணைந்து கண்டன ஆர்ப்பாட்டம் நடத்த இருக்கிறோம்.
ஒன்றிய அரசின் மக்கள் விரோத நிலைப்பாட்டை கண்டித்து, குறிப்பாக காஸ் விலை உள்ளிட்ட அத்தியாவசியப் பொருள் உயர்வை கண்டித்து இந்த ஆர்ப்பாட்டம் தமிழ்நாடு முழுவதும் நடைபெற உள்ளது. இடதுசாரிகள் மற்றும் விசிக நீண்ட காலமாக மதச்சார்பற்ற அரசியல் களத்தில் இணைந்து பயணித்து வருகிறோம். எதிர்காலத்திலும் முக்கிய அரசியல் முடிவுகளை இணைந்தே எடுப்போம். தொங்கு சட்டசபை குறித்து பொறுத்திருந்து பார்ப்போம். இவ்வாறு அவர்கள் கூறினார்கள்.
