திருநெல்வேலி மாவட்டத்தில் வேட்புமனு தாக்கல் 

திருநெல்வேலி மாவட்டத்தில் வேட்புமனு தாக்கல்
திருநெல்வேலி மாவட்டத்தில் நடைபெறவுள்ள 2026-ஆம் ஆண்டு தமிழ்நாடு சட்டமன்றப் பொதுத் தேர்தலை முன்னிட்டு, இந்திய தேர்தல் ஆணையத்தின் அறிவுறுத்தலின்படி வேட்புமனு தாக்கல் தொடர்பான விரிவான தகவல்களை மாவட்ட தேர்தல் அலுவலரும் மாவட்ட ஆட்சித்தலைவருமான மரு. இரா. சுகுமார், இ.ஆ.ப., அவர்கள் வெளியிட்டுள்ளார்.
அதன்படி, வேட்புமனு தாக்கல் செய்யும் செயல்முறை 30.03.2026 (திங்கட்கிழமை) அன்று தொடங்கி 06.04.2026 (திங்கட்கிழமை) அன்று முடிவடைகிறது. இந்த காலக்கட்டத்தில் தினமும் காலை 11 மணி முதல் மாலை 3 மணி வரை மட்டுமே வேட்பாளர்கள் தங்களது வேட்புமனுக்களை சம்பந்தப்பட்ட தொகுதி தேர்தல் நடத்தும் அலுவலரிடம் நேரில் சமர்ப்பிக்க வேண்டும்.
மேலும், 1881-ஆம் ஆண்டு செலாவணி முறிச்சட்டத்தின் கீழ் அரசு அறிவித்துள்ள பொது விடுமுறை நாட்களான 31.03.2026 (செவ்வாய்க்கிழமை), 01.04.2026 (புதன்கிழமை), 03.04.2026 (வெள்ளிக்கிழமை) மற்றும் 05.04.2026 (ஞாயிற்றுக்கிழமை) ஆகிய தினங்களில் வேட்புமனு தாக்கல் செய்ய அனுமதி இல்லை என தெரிவிக்கப்பட்டுள்ளது.
வேட்புமனு தாக்கல் செய்ய விரும்பும் வேட்பாளர்கள், தேர்தல் ஆணையம் நிர்ணயித்துள்ள வழிமுறைகள் மற்றும் விதிமுறைகளை கண்டிப்பாக பின்பற்ற வேண்டும். தேவையான ஆவணங்கள், வருமான வரி விவரங்கள், குற்றவியல் பின்னணி தகவல்கள் உள்ளிட்ட அனைத்தும் முறையாக இணைக்கப்பட்டிருக்க வேண்டும். தவறுகள் அல்லது குறைபாடுகள் இருந்தால் மனுக்கள் நிராகரிக்கப்படும் எனவும் எச்சரிக்கப்பட்டுள்ளது.
மேலும், வேட்புமனு தாக்கல் செய்யும் போது சட்டம்-ஒழுங்கு மற்றும் கூட்ட நெரிசலை தவிர்க்கும் வகையில், வேட்பாளர்கள் குறைந்தபட்ச ஆதரவாளர்களுடன் வர வேண்டும் என அறிவுறுத்தப்பட்டுள்ளது. தேர்தல் அலுவலக வளாகங்களில் பாதுகாப்பு ஏற்பாடுகள் செய்யப்பட்டுள்ளன.
வேட்புமனு தாக்கல் செய்யும் கடைசி நாள் 06.04.2026 (திங்கட்கிழமை) ஆகும். கடைசி நாளில் அதிகமான மனுக்கள் வர வாய்ப்பு உள்ளதால், வேட்பாளர்கள் முன்கூட்டியே மனு தாக்கல் செய்யுமாறு மாவட்ட நிர்வாகம் கேட்டுக் கொண்டுள்ளது.
இந்த அறிவிப்பை மாவட்ட தேர்தல் அலுவலரும் மாவட்ட ஆட்சித்தலைவருமான மரு. இரா. சுகுமார், இ.ஆ.ப., அவர்கள் வெளியிட்டு, தேர்தல் செயல்முறைகள் சீராக நடைபெற அனைவரும் ஒத்துழைக்க வேண்டும் என கேட்டுக்கொண்டுள்ளார்.