தமிழ்த் தேசிய எழுச்சி மாநாட்டு தீர்மானங்கள், மாநில சுயாட்சி உள்ளிட்ட பல்வேறு கோரிக்கைகள் குறித்து ஆலோசனை

சென்னை: விடுதலைச் சிறுத்தைகள் கட்சியின் சார்பில் உளுந்தூர்பேட்டையில் நடைபெற்ற தமிழ்த் தேசிய எழுச்சி மாநாட்டை முன்னிட்டு, அக்கட்சியின் தலைவர் எழுச்சித்தமிழர் அவர்கள் இன்று தலைமைச் செயலகத்தில் தமிழ்நாடு முதலமைச்சர் திரு. ஜோசப் விஜய் அவர்களை சந்தித்து பேசினார்.

உளுந்தூர்பேட்டையில் நடைபெற்ற தமிழ்த் தேசிய எழுச்சி மாநாட்டிற்கு வாழ்த்து செய்தி அனுப்பிய முதலமைச்சருக்கு நன்றி தெரிவிக்கும் வகையிலும், ஆட்சி அமைத்து 100 நாட்களை வெற்றிகரமாக கடந்ததற்கு வாழ்த்து தெரிவிக்கும் வகையிலும் இந்த சந்திப்பு நடைபெற்றது.

மேலும், தமிழ்நாடு அரசின் ஆட்சி ஐந்தாண்டு காலமும் எந்தவித இடையூறும் இல்லாமல் தொடர்ந்து செயல்பட விடுதலைச் சிறுத்தைகள் கட்சியின் ஆதரவு எப்போதும் இருக்கும் என்பதையும் முதலமைச்சரிடம் உறுதிப்படுத்தியதாக தெரிவிக்கப்பட்டது.

தமிழ்த்தாய் வாழ்த்து மற்றும் தொகுதி வரையறை

அனைத்து அரசு மற்றும் பொது நிகழ்ச்சிகளிலும் தமிழ்த்தாய் வாழ்த்துக்கு முதலிடம் அளிக்கும் வகையில் தீர்மானம் கொண்டு வந்ததற்காக முதலமைச்சருக்கு நன்றி மற்றும் பாராட்டுகளை தெரிவித்தனர்.

அதேபோல், நாடாளுமன்ற தொகுதி வரையறை தொடர்பாக தமிழ்நாடு அரசு நிறைவேற்றிய தீர்மானத்தையும் பாராட்டினர். அரசியல் ரீதியாக கட்சிகளுக்கிடையே வேறுபாடுகள் இருந்தாலும், தமிழ்நாட்டின் நலன் சார்ந்த விவகாரங்களில் தமிழர்கள் அனைவரும் ஒரே அணியில் இருப்பதை இந்திய ஒன்றிய ஆட்சியாளர்களுக்கு உணர்த்தும் வகையில் இந்த நடவடிக்கை அமைந்துள்ளதாகவும் தெரிவித்தனர்.

125 தீர்மானங்கள் முதலமைச்சரிடம் வழங்கல்

உளுந்தூர்பேட்டையில் நடைபெற்ற தமிழ்த் தேசிய எழுச்சி மாநாட்டில் நிறைவேற்றப்பட்ட 125 தீர்மானங்களையும் முதலமைச்சரிடம் வழங்கினர்.

மாநில உரிமைகள் தொடர்பாக தமிழ்நாட்டு மக்கள் எதிர்பார்க்கும் பல்வேறு அம்சங்கள் அந்த தீர்மானங்களில் இடம்பெற்றுள்ளதாகவும், குறிப்பாக மாநில சுயாட்சியை வலியுறுத்தும் தீர்மானம் மிகவும் முக்கியமானது என்றும் முதலமைச்சரிடம் எடுத்துரைக்கப்பட்டது.

பேரறிஞர் அண்ணா மற்றும் கலைஞர் காலங்களில் மாநில சுயாட்சி கோரிக்கை வலுவாக முன்வைக்கப்பட்டதைப் போல, தொடர்ந்து மாநில சுயாட்சிக்கான குரலை தமிழ்நாடு அரசு வலுவாக ஒலிக்க வேண்டும் என்றும் வலியுறுத்தப்பட்டது.

தமிழ்த்தேசியம் குறித்து விளக்கம்

தமிழ்த்தேசியம் என்பது வெறும் மொழி மற்றும் இன உணர்வு மட்டுமல்ல என்றும், பிற மொழி பேசும் மக்களுக்கு எதிரான வெறுப்பு அரசியல் அல்ல என்றும் தெரிவிக்கப்பட்டது.

சாதி ஒழிப்பு, மதச்சார்பின்மை, மாநில சுயாட்சி மற்றும் அகில இந்திய அளவில் தேசிய இனங்களின் ஐக்கியம் ஆகியவற்றை முன்னிறுத்துவதே தமிழ்த்தேசியத்தின் அடிப்படை நோக்கம் எனவும், இதனை விளக்கும் வகையிலேயே தமிழ்த் தேசிய எழுச்சி மாநாடு ஒருங்கிணைக்கப்பட்டதாகவும் முதலமைச்சரிடம் எடுத்துரைக்கப்பட்டது.

மேகமலை பிரச்சினை குறித்து வலியுறுத்தல்

மேகமலை பகுதியில் நூறு ஆண்டுகளுக்கும் மேலாக வசித்து வரும் மக்களையும், அங்கு விவசாயம் செய்து வரும் மக்களையும் அங்கிருந்து அப்புறப்படுத்தக் கூடாது எனவும் முதலமைச்சரிடம் வலியுறுத்தப்பட்டது.

அப்பகுதி மக்களுக்கு எதிரான உச்சநீதிமன்ற தீர்ப்பை எதிர்த்து தமிழ்நாடு அரசு சீராய்வு மனு தாக்கல் செய்யும் என சட்டத்துறை அமைச்சர் ஏற்கனவே தெரிவித்துள்ள நிலையில், அந்த சீராய்வு மனுவை உடனடியாக தாக்கல் செய்து, பாதிக்கப்பட்ட மக்களுக்கு உரிய நீதியை பெற்றுத்தர நடவடிக்கை எடுக்க வேண்டும் என்றும் கோரிக்கை விடுக்கப்பட்டது.

அமுதன் படுகொலை – சிறப்பு புலனாய்வு குழு கோரிக்கை

அமுதன் படுகொலை வழக்கில் போதைப்பொருள் புழக்கம் தொடர்பாக அமுதனின் பெற்றோர் உள்ளிட்ட பலரும், தொண்டு நிறுவனங்களும் தொடர்ந்து வலியுறுத்தி வருவதாகவும் தெரிவிக்கப்பட்டது.

இந்த வழக்கை சிறப்பு புலனாய்வுக் குழு அமைத்து விசாரணை நடத்த வேண்டும் என்றும், தமிழ்நாட்டில் போதைப்பொருள் புழக்கத்தை கட்டுப்படுத்த தனிப்பட்ட போதைப்பொருள் ஒழிப்பு அதிரடிப்படை ஒன்றை உருவாக்க வேண்டும் என்றும் முதலமைச்சரிடம் விடுதலைச் சிறுத்தைகள் கட்சியின் சார்பில் கோரிக்கை முன்வைக்கப்பட்டது.

இந்த விவகாரத்தில் முதலமைச்சர் கூடுதல் கவனம் செலுத்த வேண்டும் என்றும் வலியுறுத்தப்பட்டது.

இந்த சந்திப்பு மிகவும் சிறப்பாகவும், பல்வேறு முக்கியமான மக்கள் நலன் மற்றும் மாநில உரிமை சார்ந்த விவகாரங்களை விவாதிக்கும் வகையிலும் அமைந்ததாக தெரிவிக்கப்பட்டது.

இந்த சந்திப்பின்போது பொதுச் செயலாளர் அண்ணன் சிந்தனைச்செல்வன், துணைப் பொதுச் செயலாளர் மற்றும் சமூகநீதி துறை அமைச்சர் அண்ணன் வன்னி அரசு, பொருளாளர் அண்ணன் எஸ்.எஸ். பாலாஜி மற்றும் டாக்டர் நெல்சன் உள்ளிட்டோர் உடனிருந்தனர்.