நரசிங்கநல்லூர் கிராமத்தில் அடிப்படை வசதிகள் இல்லாமல் மக்கள் அவதி
அங்கன்வாடி மையம் அமைக்க கோரி கிராம மக்களின் நீண்டநாள் கோரிக்கை
திருவண்ணாமலை மாவட்டம், செங்கம் வட்டம், கலசபாக்கம் சட்டமன்றத் தொகுதிக்கு உட்பட்ட புதுப்பாளையம் ஒன்றியத்தில் அமைந்துள்ள நரசிங்கநல்லூர் கிராமத்தில் அடிப்படை வசதிகள் இல்லாததால் பொதுமக்கள் கடும் சிரமங்களை எதிர்கொண்டு வருகின்றனர்.
பல ஆண்டுகளாக சாலை, குடிநீர், கழிவுநீர் வடிகால் உள்ளிட்ட அத்தியாவசிய வசதிகள் முறையாக ஏற்படுத்தப்படாத நிலையில், கிராம மக்களின் வாழ்க்கை பாதிக்கப்பட்டுள்ளதாக கூறப்படுகிறது.
குறிப்பாக, கிராமத்தில் ஏராளமான இளம் குழந்தைகள் வசித்து வரும் நிலையிலும், இதுவரை அங்கன்வாடி மையம் அமைக்கப்படாதது பெற்றோர்கள் மற்றும் பொதுமக்கள் மத்தியில் அதிருப்தியை ஏற்படுத்தியுள்ளது.
குழந்தைகளின் ஆரம்பகால கல்வி, ஊட்டச்சத்து மற்றும் சுகாதார சேவைகளுக்காக அங்கன்வாடி மையம் அவசியமானதாக இருந்தும், அதற்கான நடவடிக்கைகள் எதுவும் மேற்கொள்ளப்படவில்லை என கிராம மக்கள் வேதனை தெரிவிக்கின்றனர்.
இது தொடர்பாக பலமுறை சம்பந்தப்பட்ட துறை அதிகாரிகள் மற்றும் உள்ளாட்சி நிர்வாகத்தின் கவனத்திற்கு கொண்டு செல்லப்பட்டதாகவும், மனுக்கள் அளிக்கப்பட்டதாகவும் கூறப்படுகிறது. எனினும், இதுவரை எந்தவிதமான முன்னேற்றமும் ஏற்படாமல் அலட்சியப் போக்கு நீடித்து வருவதாக பொதுமக்கள் குற்றம்சாட்டுகின்றனர்.
எனவே, திருவண்ணாமலை மாவட்ட ஆட்சியர் நேரடியாக தலையிட்டு நரசிங்கநல்லூர் கிராமத்தின் அடிப்படை தேவைகளை ஆய்வு செய்து, உடனடி நடவடிக்கைகள் மேற்கொள்ள வேண்டும் என்றும், குழந்தைகளின் நலனை கருத்தில் கொண்டு அங்கன்வாடி மையம் விரைவில் அமைக்கப்பட வேண்டும் என்றும் கிராம மக்கள் வலியுறுத்தியுள்ளனர்
“தமிழன் உதயம்” குழுமம் இந்த பிரச்சினையை வெளிச்சத்திற்கு கொண்டு வந்துள்ள நிலையில், மாவட்ட நிர்வாகம் இதனை அவசரமாக பரிசீலித்து மக்களின் நீண்டநாள் கோரிக்கைக்கு தீர்வு காணும் என பொதுமக்கள் நம்பிக்கை தெரிவித்துள்ளனர்.
செய்திகளுக்காக:
கா. சென்ன கிருஷ்ணன், திருவண்ணாமலை.
தொகுப்பு:
பெ. எலியாஸ், உதவி ஆசிரியர், தமிழன் உதயம் & எழுச்சி தமிழர் தொலைக்காட்சி.
