மாநில களரிப்பயட்டு போட்டியில் நெல்லை வீரர்கள் சாதனை!
7 வீரர்கள் தேசிய அளவிலான போட்டிக்கு தகுதி – வேழம் அகாடமி மாஸ்டர், பயிற்சியாளருக்கு பாராட்டு
அம்பை, அக்.5:
உடுமலைப்பேட்டையில் நடைபெற்ற 10-வது மாநில அளவிலான களரிப்பயட்டு போட்டி – 2026-ல் திருநெல்வேலி மாவட்டத்தைச் சேர்ந்த வீரர்கள் சிறப்பாகப் பங்கேற்று வெற்றி பெற்றுள்ளனர். இதில் நெல்லை மாவட்டத்தைச் சேர்ந்த 7 வீரர்கள் வெற்றி பெற்று, தேசிய அளவிலான களரிப்பயட்டு போட்டியில் பங்கேற்க தகுதி பெற்றுள்ளனர்.
தமிழ்நாட்டின் பல்வேறு மாவட்டங்களில் இருந்து ஏராளமான மாணவ, மாணவியர்கள் கலந்து கொண்ட இப்போட்டியில், வீரர்கள் பல்வேறு களரிப்பயட்டு பிரிவுகளில் தங்களது திறமைகளை வெளிப்படுத்தினர். போட்டிகளில் திறமையுடன் செயல்பட்ட நெல்லை மாவட்ட வீரர்கள் வெற்றிகளைப் பெற்று மாவட்டத்திற்கு பெருமை சேர்த்துள்ளனர்.
குறிப்பாக, வாள் மற்றும் கேடயம் சண்டைப் பிரிவில் சிறப்பாகப் போட்டியிட்டு தேசிய அளவிலான போட்டிக்குத் தகுதி பெற்றுள்ளனர். இவர்களுக்கு பயிற்சி அளித்து வரும் திருநெல்வேலி மாவட்டம் கல்லிடைக்குறிச்சியைச் சேர்ந்த வேழம் அகாடமி மாஸ்டர் முத்துராமன் மற்றும் பயிற்சியாளர் முத்து ராம சுப்பிரமணியன் ஆகியோரின் பங்களிப்பு குறிப்பிடத்தக்கதாக அமைந்துள்ளது.
தேசிய அளவிலான போட்டிக்குத் தகுதி பெற்ற வீரர்களையும், அவர்களுக்கு முறையான பயிற்சி அளித்து வரும் மாஸ்டர் மற்றும் பயிற்சியாளரையும் தமிழ்நாடு களரிப்பயட்டு அசோசியேஷன் மாநில இணைச் செயலாளரும், மாவட்டத் தலைவருமான ஆல்வின் ஜெகதீஸ் குருக்கள் நேரில் பாராட்டி வாழ்த்துகளைத் தெரிவித்தார்.
மாநில அளவிலான போட்டியில் வெற்றி பெற்று தேசிய அளவிலான போட்டிக்கு தகுதி பெற்றுள்ள நெல்லை மாவட்ட வீரர்கள், அடுத்த கட்டப் போட்டியிலும் சிறப்பாக செயல்பட்டு பதக்கங்களை வெல்ல வேண்டும் என விளையாட்டு ஆர்வலர்கள் வாழ்த்து தெரிவித்துள்ளனர்.
களரிப்பயட்டு போன்ற பாரம்பரிய தற்காப்புக் கலைகளில் இளம் தலைமுறையினர் ஆர்வத்துடன் ஈடுபட்டு வருவதற்கு இத்தகைய வெற்றிகள் ஊக்கமளிப்பதாகவும், வீரர்களின் சாதனை மூலம் திருநெல்வேலி மாவட்டத்திற்கு மேலும் பெருமை கிடைத்துள்ளதாகவும் பொதுமக்கள் தெரிவித்தனர்.
