தென் தமிழகத்தில் முதன்முறையாக தழும்புகள் இல்லாத நவீன சிகிச்சை: மார்பகக் கட்டியை வெற்றிகரமாக நீக்கிய மதுரை அப்போலோ மருத்துவமனை

தென் தமிழகத்தில் முதன்முறையாக தழும்புகள் இல்லாத நவீன சிகிச்சை: மார்பகக் கட்டியை வெற்றிகரமாக நீக்கிய மதுரை அப்போலோ மருத்துவமனை

மதுரை, ஜூன் 16:

தென் தமிழகத்திலேயே முதன்முறையாக, தழும்புகள் ஏற்படாத நவீன ‘வேக்யூம் அசிஸ்டெட் பிரஸ்ட் பயாப்ஸி’ (Vacuum-Assisted Breast Biopsy – VABB) தொழில்நுட்பம் மூலம், 20 வயது இளம்பெண்ணின் மார்பகக் கட்டியை வெற்றிகரமாக நீக்கி மதுரை அப்போலோ சிறப்பு மருத்துவமனை சாதனை படைத்துள்ளது.

தென்காசி மாவட்டத்தைச் சேர்ந்த 20 வயது இளம்பெண், கடந்த நான்கு மாதங்களாக இடது மார்பகத்தில் வலி மற்றும் வீக்கத்தால் அவதிப்பட்டு வந்தார். இதையடுத்து மேற்கொள்ளப்பட்ட அல்ட்ராசவுண்ட் பரிசோதனையில், அவருக்கு ‘ஃபைப்ரோஅடினோமா’ (Fibroadenoma) எனப்படும் தீங்கற்ற மார்பகக் கட்டி இருப்பது கண்டறியப்பட்டது.

தொடர்ந்து சிகிச்சைக்காக மதுரை அப்போலோ சிறப்பு மருத்துவமனையில் அனுமதிக்கப்பட்ட அவருக்கு, வழக்கமான அறுவை சிகிச்சைக்கு மாற்றாக, இன்டர்வென்ஷனல் ரேடியாலஜி துறையின் பரிந்துரையின் பேரில், குறைந்த பாதிப்பை ஏற்படுத்தும் VABB சிகிச்சை முறை மேற்கொள்ளப்பட்டது.

இந்தச் சிகிச்சையில், அல்ட்ராசவுண்ட் வழிகாட்டுதலுடன் சிறிய துளை வழியாக, 4 × 3 செ.மீ. அளவுள்ள கட்டி, 9G VABB ஊசியைப் பயன்படுத்தி எந்தவிதத் தையலும் இன்றி வெற்றிகரமாக அகற்றப்பட்டது. சிகிச்சைக்குப் பின்னர் எந்தவித சிக்கல்களும் ஏற்படாத நிலையில், நோயாளி அன்றே வீடு திரும்பினார்.

இதுகுறித்து சிகிச்சையை மேற்கொண்ட கதிரியக்க நிபுணர் டாக்டர் கே.பி. சந்தோஷ் பாபு கூறுகையில், “வேக்யூம் அசிஸ்டெட் பிரஸ்ட் பயாப்ஸி என்பது அதிநவீன, குறைந்த பாதிப்பை ஏற்படுத்தும் சிகிச்சை முறையாகும். இது தீங்கற்ற மார்பகக் கட்டிகளை அறுவை சிகிச்சை இன்றி முழுமையாக அகற்ற உதவுகிறது. குறைந்த வலி, விரைவான குணமடைதல், தழும்புகள் இல்லாமை மற்றும் அழகியல் ரீதியாக சிறந்த பலன்களை வழங்குவதால், இளம் பெண்களுக்கு இந்தச் சிகிச்சை மிகவும் பயனுள்ளதாக உள்ளது” என்றார்.

மேலும், “அல்ட்ராசவுண்ட் வழிகாட்டுதலுடன் கூடிய இந்த நவீன தொழில்நுட்பம் மூலம், ஆரோக்கியமான மார்பகத் திசுக்களைப் பாதுகாத்து, கட்டிகளைத் துல்லியமாக அகற்ற முடிகிறது. இதன் மூலம் தேவையற்ற பயம் மற்றும் பாரம்பரிய அறுவை சிகிச்சை தொடர்பான சிரமங்களை பெண்கள் தவிர்க்க முடியும்” என்றும் அவர் தெரிவித்தார்.

மதுரை அப்போலோ மருத்துவமனையின் மண்டல தலைமைச் செயல் அதிகாரி டாக்டர் நிகில் திவாரி கூறுகையில், “நோயாளிகளின் சிரமங்களைக் குறைத்து, மருத்துவமனையில் தங்கும் காலத்தை சுருக்கி, சிகிச்சை முடிவுகளை மேம்படுத்தும் நவீன தொழில்நுட்பங்களை தொடர்ந்து அறிமுகப்படுத்தி வருகிறோம். உலகத் தரத்திலான குறைந்த பாதிப்பு சிகிச்சைகளை வழங்குவதில் எங்களின் உறுதிப்பாட்டை இந்த சாதனை வெளிப்படுத்துகிறது” என்றார்.

மருத்துவத் தலைவர் டாக்டர் பி. சோபனா கூறுகையில், “இமேஜ்-கைடட் சிகிச்சை முறைகள் பாரம்பரிய அறுவை சிகிச்சையின் தேவையை கணிசமாகக் குறைப்பதுடன், துல்லியமான, பாதுகாப்பான மற்றும் பயனுள்ள சிகிச்சையை வழங்க உதவுகின்றன. இதன் மூலம் நோயாளிகள் விரைவாக இயல்பு வாழ்க்கைக்குத் திரும்ப முடிகிறது” என்றார்.